સમગ્ર ભારત વર્ષમાં દાનનો અરંપાર મહિમાને સાર્થક કરીને ભારતના ભામાશા તરીકે અપાર લોકચાહના મેળવનાર દીપચંદભાઈ ગારડીનો ૧૦૧ વર્ષની વયે દેહવિલય થયો છે. મુંબઈ ખાતે તેમણે અંતિમ શ્વાસ ખેંચતા ઘેરા શોકની લાગણી છવાઈ ગઈ છે. ભારતના સેવાકીય ગગનમાંથી એક ચમકતા સીતારાનો વિલય થયો છે.

   દીપચંદભાઈ ગારડીની અંતિમયાત્રા આજે બપોરે ૧૨ કલાકે મુંબઈની ચંદનવાડી ખાતે નીકળશે. જેમા મોટી સંખ્‍યામાં સામાજીક, શૈક્ષણિક ઉપસ્‍થિત રહી અંજલી પાઠવશે.

   છેલ્લા ૨૦ દિવસથી મુંબઈ ખાતે બીમારી સબબ હોસ્‍પીટલમાં સારવાર લેતા દાનવીર દીપચંદભાઈ ગારડીએ ગઈકાલે રાત્રે ૧૧ કલાકે અંતિમ શ્વાસ લેતા સામાજીક-શૈક્ષણિક ક્ષેત્રે ભારે શોકનું મોજુ ફરી વળ્‍યુ હતું.

   દાનવીર દીપચંદભાઈ ગારડીએ પ્રાથમિક શિક્ષણ પડધરીમાં લીધુ, બાદમાં ભાવનગર અને સુરેન્‍દ્રનગર, મુંબઈ ખાતે અભ્‍યાસ કર્યો હતો. અભ્‍યાસમા ખૂબ તેજસ્‍વી દીપચંદભાઈ ગારડીએ લંડન ખાતે બેરીસ્‍ટરની બહુમુખી પદવી પ્રાપ્‍ત કરી હતી.

   ડો. દીપચંદભાઈ ગારડીએ આરોગ્‍ય, સામાજીક તેમજ શૈક્ષણિક ક્ષેત્રે દરરોજ લાખો રૂપિયાનું દાન કરવાનો કિર્તીમાન તેના નામે સ્‍થાપ્‍યો છે. દીપચંદભાઈ ગારડીએ સૌરાષ્‍ટ્ર યુનિવર્સિટીમા કરોડો રૂપિયાનું દાન સખાવત કર્યુ છે.

   સૌરાષ્‍ટ્ર યુનિવર્સિટી દ્વારા દાનવીર દીપચંદભાઈ ગારડીએ ડી'લીટની પદવી એનાયત કરવામાં આવી છે.

   વઢવાણના અમારા પ્રતિનિધિ ફઝલ ચૌહાણનો અહેવાલ જણાવે છે કે, વઢવાણના જૈન દાનવીર અને હાલના મુંબઈ ખાતે વસવાટ કરતા જૈન આગેવાન અને મોટા દાનવીર એવા દીપચંદભાઈ ગારડીનું અવસાન મુંબઈ ખાતે ગત રાત્રીના ૧૨ વાગ્‍યે થયેલ હતું.

   ત્‍યારે વઢવાણ વતની હોવાના નાતે વઢવાણ ખાતે અનેક મોટી સંસ્‍થાઓમાં દાન આપી સારી એવી નામના પામેલા આ જૈન આગેવાન દીપચંદભાઈ ગારડી શિક્ષણ સંસ્‍થાઓમાં પણ ઝાલાવાડના મોટામા મોટું યોગદાન દીપચંદભાઈ ગારડીનું સમાયેલુ રહ્યુ છે. ખાસ કરીને દીપચંદભાઈ ગારડી મુંબઈથી અવારનવાર માંડવરાયજીના દર્શનાર્થે મુળી ખાતે આવતા હતા આગેવાનને પણ મળતા હતા ત્‍યારે ઝાલાવાડમાં માત્ર એક જ વર્ષના ટૂંકા સમયગાળામાં પ્રથમ સી.યુ. શાહ અને દીપચંદભાઈ બે દાનવીરો ઝાલાવાડે ગુમાવવાથી મોટી ખોટ પડી છે અને ઝાલાવાડ સહિતના અનેક ગામોમાં શોકનો માહોલ છવાઈ જવા પામ્‍યો છે. સુરેન્‍દ્રનગરના પૂર્વ ધારાસભ્‍ય ધનરાજભાઈ કેલા સાથે દાનવીર દીપચંદભાઈ ગારડીનો અનેરો લગાવ હતો.

   ઝાલાવડના ભામાશા તરીકેનું બીરૂદ પામેલા દીપચંદભાઈ ગારડીના અવસાનથી ન પુરાય તેવી મોટી ખોટ પડી છે.

   ઝાલાવાડમાથી અનેક સંસ્‍થાના સંચાલકો આગેવાનો મુંબઈ ખાતે તેમના નિવાસ સ્‍થાને પહોંચ્‍યા અને સ્‍મશાન યાત્રામા જોડાવા માટે રવાના થઈ ગયા છે.

   ત્‍યારે સવારના ૧૧ વાગ્‍યે તેમના નિવાસ સ્‍થાન ખાતેથી દીપચંદભાઈ ગારડીની સ્‍મશાન યાત્રા નિકળનાર છે અને મુંબઈ ખાતે ચંદનવાડી ખાતે આવેલા સ્‍મશાન ગૃહમાં અગ્નિદાહ અગ્નિસંસ્‍કાર કરવામાં આવ્‍યા છે ત્‍યારે દીપચંદભાઈ ગારડીના અવસાનથી ઝાલાવાડના ન પુરાય એવી મોટી ખોટ પડી છે.