સ્વ. કાશીબેન કુરજીભાઈ ગોલને શબ્દાંજલિ

કહેવાય છે કે જગતની તમામ ભાષાઓમાં માઁ નો અર્થ માઁ જે થાય છે...! અમારા બા કાશીબેન કુરજીભાઈ ગોલની વિદાયથી અમારા જીવનમાં ખાલીપો સર્જાયો.... અમરેલી જિલ્લાના વરસડા ગામના રણછોડભાઈ ભગવાનજીભાઈ જોટાસનની છ પુત્રીઓમાં સૌથી મોટા કાશીબેને તે જમાનામાં સંસ્કારની સાથે ગાયકવાડી ફરજીયાત શિક્ષણ પ્રાપ્ત કર્યું, જેના પરિણામે જીવનપર્યંત તેઓએ ધાર્મિક પુસ્તકોનું અધ્યયન કર્યું. દેરડી કુંભાજીના કુરજીભાઈ જશાભાઇ ગોલ સાથે લગ્નગ્રંથિથી જોડાયા લગ્નજીવનથી બે પુત્રો સ્વ. દેવશીભાઇ તથા વિઠ્ઠલભાઈ, પાંચ પુત્રીઓ હેમીબેન, જયશ્રીબેન, હંસાબેન, કંચનબેન અને દક્ષાબેનનો હર્યોભર્યો સંસાર વસ્યો. પોતાના સંતાનોની સાથે સંયુક્ત કુટુંબમાં રહેતા જેઠ જગજીભાઈના 9 સંતાનો તથા દિયર ધનજીભાઈના 6 સંતાનોના વિશાળ પરિવારને માતૃતુલ્ય મમતા આપી. 

"બા" એ જીવનકાળ દરમ્યાન કઠોર પરિશ્રમ, હકારાત્મક વિચારસરણી, કુટુંબના દરેક સભ્ય પ્રત્યેનો પ્રેમ, શાંત-સરળ સ્વભાવ, વાત્સલ્ય સભર વહેવાર અને પરોપકારી ભાવનાએ દરેકના દિલ જીતી લીધા હતા. તેમના સમગ્ર વ્યક્તિવતામાં અમોએ કર્તવ્ય પરાયણતા અને માનવતાના દર્શન કર્યા છે. જીવનની છેલ્લી ઘડી સુધી કાર્યરત રહી કર્મયોગી જીવનનું દ્રષ્ટાંત પૂરૂ પાડ્યું છે. 

"પૂજ્ય બા" નું પાવનકારી જીવન હર હંમેશ અમારા માટે પથદર્શક બની રહેશે. જેમના દિવ્ય અને સુગંધિત સંસ્કારોની કીર્તિમય સુવાસ આજે પણ અમારા જીવનના અણુએ અણુમાં પ્રસારીને અમોને અદ્દભૂત માર્ગદર્શન અને પ્રેરણા આપી રહ્યા છે.