આર. સી. પોપટ એટલે રતિલાલ છગનલાલ પોપટ. હું એમનો 1994ની બેચનો વિદ્યાર્થી. કોમ્પ્યુટરના પહેલાં વહેલાં પાઠ પણ હું પોપટ સાહેબ પાસેથી એના ઘરે શીખ્યો. પોપટ સાહેબ જ્યારે અર્થશાસ્ત્ર ભણાવતા હોય ત્યારે અમે સૌ વિદ્યાર્થીઓ એટલાં ઓતપ્રોત બની જતાં કે પિરિયડ પુરા થયાનો બેલ પણ ભૂલી જતાં. મોટાભાગે પોપટ સાહેબના સળંગ બે લેક્ચરર્સ હોય એટલે ટોપિકની લિન્ક જળવાઇ રહેતી. પોપટસાહેબ વિદ્યાર્થીઓને કાયમ કોર્સ બહારનું અને ખાસ તો સાંપ્રત અર્થ ગતિવિધિઓ વિશે જણાવીને સૌને બદલાતાં સમય સાથે જોડતાં. ખાસ કરીને દર વરસે અંદાજપત્ર ઉપર એમનાં લેકચર યાદગાર રહેતાં.

1991માં એ સમયના નાણામંત્રી મનમોહન સિંહે ઘડેલી નવી ઔદ્યોગિક નીતિ અને એના સૂચિતાર્થો પર એમણે કરેલી આગાહી અક્ષરસહ આજે સાચી પડેલી જોઇ શકાય છે. મેં એ નવી ઔદ્યોગિક નીતિ ઉપર વિસ્તારથી લખેલો લેખ પોપટ સાહેબે વાંચીને મઠારી દીધો હતો. એટલું જ નહીં પણ એ લેખ પછી 'અર્થસંકલન' જેવાં અધિકૃત મેગેઝિનમાં કોલેજ તરફી મોકલી આપ્યો હતો. પોતે કાયમ પડદા પાછળ રહીને વિદ્યાર્થીને એ આગળ કરતાં અને પછી એ લેખ છપાઇને આવ્યો તો બધે પોરસાઇને કહેતાં કે 'મારાં વિદ્યાર્થીનો લેખ અર્થસંકલનમાં છપાયો છે. આ જુઓ.' 

અર્થશાસ્ત્ર સિવાય પોપટ સાહેબ કોલેજમાં નાટ્ય પ્રવૃતિને પણ પ્રોત્સાહન આપતાં. યુનિ. યુથ ફેસ્ટિવલ માટે દર વરસે નાટક, એક પાત્રિય અભિનય, મૂક અભિનય, વકતૃત્વ વગેરે માટે વિદ્યાર્થીઓને તૈયાર કરવા માટે એ કાયમ પ્રોત્સાહન અને માર્ગદર્શન પુરુ પાડતાં. એમણે રચેલું 'સૂર એકતાનો' નામનું પેન્ટોમાઇમ એ દિવસોમાં ખાસ્સુ પ્રસિદ્ધિ પામ્યું હતું. યુનિ.ની સ્પર્ધામાં પ્રથમ આવ્યા બાદ એ દુરદર્શન અને કોલેજના વાર્ષિકીત્સવમાં ભજવાયું હતું. હું એ પેન્ટોમાઇમ અને લગભગ બધાં નાટકોમાં જોડાયેલો હતો એનો આનંદ છે. રોજ સાંજ સુધી પ્રેક્ટિસ અને પ્રેક્ટિસ પછીની મસ્તી અત્યારે યાદ આવે છે. 

નિવૃતિ પછી પણ પોપટ સાહેબ સક્રિય હતાં. ચિત્રલેખામાં એમના અભિપ્રાયો અને ચર્ચાપત્રો અવારનવાર છપાતાં. આ પણ કેવો યોગાનુયોગ છે કે આજના ચિત્રલેખામાં જ એમનો ચર્ચાપત્ર છપાયેલો છે. એ હજી હમણાં મેં વાંચ્યો અને આ દુઃખદ સમાચાર જાણવા મળ્યાં. એક પ્રોફેસરનું કદી મૃત્યુ નથી થતું. પ્રોફેસર સદાય સદાકાળ માટે એનાં વિદ્યાર્થીઓમાં સમેટાઇ જતાં હોય છે. પોપટસાહેબના અક્ષરદેહને ભીની આંખે વંદન. ॐ શાંતિ ...